Ginbaton na sang Bacolod City ang Seal of Good Local Governance (SGLG) award gikan sa Department of the Interior and Local Government (DILG) sa The Manila Hotel kahapon.
Sa interview sang Bombo Radyo Bacolod kay Vice Mayor El Cid Familiaran, ginakabig sini nga isa ka dako nga kadalag-an ang nakuha sang ciudad nga SGLG awards.
Suno diri, panghangkat lamang karon sa city government amo ang kun paano ma-maintain ang record.
Dugang pa sini nga kaupod nila ni Mayor Evelio Leonardia nga nagkuha sang award amo si DILG-Bacolod director Ma. Joy Maredith Madayag kag iban pa nga mga opisyal sang ciudad.
Nahibaluan nga agud makakuha sang SGLG awards, dapat makapasar ang mga Local Government Units (LGUs) sa pito ka mga governance core areas nga ginalakipan sang financial administration; disaster preparedness; social protection; peace and order; business-friendliness and competitiveness; environmental protection; kag tourism, culture, and the arts.
Sini nga tuig, may yara lamang sang 57 sa 145 ka mga ciudad sa bilog nga pungsod nga nakakuha sang SGLG awards.
Kaupod sang Bacolod City nga nakakuha sang SGLG awards sa Western Visayas amo ang ciudad sang San Carlos, Silay, Victorias sa probinsiya sang Negros Occidental kag Passi City sa probinsiya sang Iloilo.
