Emosyonal ang isa ka agalon matapos masapwan nga wala na sang kabuhi ang iya ido nga Shih Tzu kasunod sa nagluntad nga sunog sa Purok Maanyag 2, Brgy. Alijis, Bacolod City kagab-i, May 6.
Sa interview sang Bombo Radyo kay Fernando Lanay, indi lang basta alaga kundi isa na ka matuod nga bata ang iya pagkabig kay Panda kag sa iya iban pa nga mga ido.
Nahibaluan nga wala sang bata ang mag-asawa, gani ang mga sapat na ang nangin kaupod ni Lanay sa ila balay samtang ang iya asawa ang nagatrabaho sa Middle East.
Sa sulod sang duha ka tuig, gin-atipan ni Lanay ang iya mga Shih Tzu halin sa pagpakaon tubtob sa paghatag sang bulong kun nagamasakit.
Suno diri, sang natabo ang sunog, gintungahan sini salbar ang tatlo niya ka mga ido nga sanday White, Coco kag Snow.
Apang suno diri, wala niya makita si Panda sa sulod sa balay gani ang tatlo lang niya ka mga ido ang nadala sa gwa kag pagbalik sini wala na niya nahingagaw salbar si Panda bangud gintupok na sang kalayo ang ila nga balay.
Dugang pa sini, wala man sila sang may nasalbar nga mga kagamitan bangud ginsiguro nila ang ila mga ido.
