Nagahulat ang mga shipping companies nga mapagwa sang Executive Order ang local executives sang syudad sang Bacolod kag probinsya sang Negros Occidental angot sa pagbalik sang biyahe sang fastcraft kag RORO vessel sa Hunyo 15.
Sa interview sang Bombo Radyo Bacolod kay Frank Carbon, operator sang Weesam Express, ginpahayag sini nga kinahanglan nga iamend sang local executives ang gin-isyu nila nga executive order agud mangin giya sa mga stakeholders sa pagbalik sang biyahe matapos ang masobra ka duha ka bulan nga nag-untat ini bangud sa ginpatuman nga community quarantine agud matapna ang paglapta sang coronavirus 2019 (Covid-19).
Ginalantaw pa man kun nagikan sa 22 ka mga trips, himuon na lamang ini nga siyam, tatlo sa Banago kag anom sa BREDCO.
Suno kay Carbon, ipatuman man sang mga ini sa gihapon ang minimum health standards kag ginkompirmar man sini nga sang nakaligad pa nga semana nakapreparar na ang mga shipping lines sa pagbalik sang biyahe apang nakanselar.
Wala man sang ipatuman nga pagpasaka sa pamasahe apisar nga may yara sang pagsaka sa presyo sang krudo.
Nahibaluan nga deregulated ang pamasahe sa barko gani hilway sila nga magpasaka ukon magpanubo sang pletehan, indi kaangay sa land transport nga kinahanglan aprubahan sang Land Transportation Franchising and Regulatory Board (LTFRB).
Sa tion nga magpasaka sila sang pletehan, kinahanglan lamang nga maghatag sang kortesiya sa Maritime Industry Authority (MARINA) agud sa tion nga may mamangkot may yara man sang isabat ang ahensya.
