BACOLOD CITY-Ginahulat pa sang mga shipping lines ang guidelines nagikan sa local executives sang Bacolod kag Iloilo agud mangin giya sa pagbalik sang biyahe.
Ini ang kasunod sang pahayag ni Bacolod City Mayor Evelio Leonardia nga nagkasugot sila ni Iloilo City Mayor Jerry Treñas nga mangin free flow na ang byahe sang mga barko nga nagalayag Bacolod-Iloilo vice versa.
Sa interview sang Bombo Radyo Bacolod kay Maritime Industry Authority (MARINA) Region 6 director Jose Venancio Vero, ginpahayag sini sang nabasa niya ang press release nagikan sa Bacolod City government kun sa diin nakabutang nga ginatugutan na ang free flowing nga sea travel, gintawgan sini ang representative sang Supercat agud pahibaluon nga mahimo na sila magbiyahe.
Apang naghambal ang representative sang fast craft nga indi pa sila magresume sa biyahe bangud wala pa sang guidelines nga gin-isyu ang mga local executives.
Ginpahayag man sini nga kinahanglan man nga magpangayo sang approval ang mga shipping lines sa opisina sini sa tion nga magbuhin sang number of trips bilang kabahin sang security measures sa new normal.
Nakadepende naman sa numero sang pasahero ang pagbuhin sa trips sang fast craft kun sa diin ginakuhaan sang approval sa opisina sang MARINA.
Ginpangabay man ni Vero sa mga pasahero nga magbook sang ticket sang mas temprano bangud wala sang kasiguruhan nga makasakay sila sa adlaw sang ila pagbiyahe kag limitado ang mga pasahero nga batunon sang barko bangud sa social distancing.
Nagpanawagan man ini sa publiko nga sundon ang mga health protocols sa pagbiyahe.
Samtang, ginpahayag man sang pinuno sang Philippine Coast Guard Station Negros Occidental nga wala pa sang nagbiyahe nga fastcraft subong nga adlaw.
Suno kay Commander Jansen Benjamin, una na nga nagpadala sang sulat sa opisina sini ang Ocean Jet nga indi makabiyahe bangud ang barko sini ang yara pa sa Cebu agud marepair.
