Nagsapol kaina sang aga ang mga shipping companies kag local government units (LGUs) agud athagon ang mga executive orders angot sa pagbalik sang biyahe sang mga fastcraft nga nagalayag Iloilo-Bacolod vice versa.
Sa interview sang Bombo Radyo Bacolod kay Frank Carbon, operator sang Weesam Express, ginpahayag sini nga may pila pa sila ka mga luyag klaruhon sa mga EO.
Suno kay Carbon, nakasaad sa executive order ni Iloilo City Mayor Jerry Treñas nga pwede na makasulod sa ila ciudad ang tanan nga mga byahero kag wala na sang restrictions.
Apang, sa EO naman nga gin-issue ni Bacolod City Mayor Evelio “Bing” Leonardia, nakabutang naman diri nga ginadumilian gid ang leisure travel.
Pasalig ni Carbon nga kun maathag na gid ang tanan, magadesisyon na sila kun san-o gid man mabalik ang byahe nga una na nila ginalantaw sa Oktubre 31.
Magluwas dira, ila man istoryahan kun pila ka trips ang ila pagahimuon sa isa ka adlaw.
Suno pa kay Carbon nga kun madayon gid man ang biyahe, posible nga indi sila anay magpasaka sang plete sa una nga semana.
Ila anay lantawon ang volume sang pasahero kag kun diutay ang magasakay, dira na sila mapilitan nga magpasaka sang plete.
Samtang, ginkumpirmar naman ni Carbon nga wala sang problema kun wala pa sang BACTRAC ID ang mga pasahero.
Suno sa iya, gina-engganyo lang ang tanan nga magparehistro agud mas mangin mahapos ang contact tracing.
Apang bangud sa kabudlayan subong nga makasulod sa system, ginpasugiro sini nga pwede sa gihapon makasakay ang mga pasahero apisar wala sang BACTRAC ID bangud pwede man sila makasulat sa health declaration form.
