Gin-ako sang makawala nga grupo ang pagpatay sa 43-anyos nga mangunguma sa Sitio Badyang, Barangay Camindangan, banwa sang Cauayan sang Hunyo 19.
Ginkilala ang bikitma nga si alyas Arnel, 43-anyos, lalaki, single, mangunguma kag residente sang nasambit nga lugar.
Kahapon, namonitor sang Intelligence Operatives (IOC) sang Cauayan Municipal Police Station ang isa ka article nga ginpublished sa website nga Philippinerevolution.nu.
Ini ang ginsulat ni Andrea Guerrero, spokeperson sang NPA-Southwest Negros, Negros Island Regional Operational Command, New People’s Army, nga may petsa nga Hunyo 23, 2026, nga naga-ako nga sila ang responsable sa pagpatay kay alyas “Arnel”.
Sa imbestigasyon sang Cauayan Municipal Police Station (MPS), ginpahayag ni alyas “Irene”, utod sang biktima nga alas-7:00 sang Hunyo 19, nakabati siya sang asud-asud nga paglupok sa lugar, ginabanta 500 meters ang kalayuon gikan sa ila nga balay apang ginpawalaan lang ini niya.
Dugang pa sini, sang Hunyo 21, ginpahibalo siya ni alyas “Alex” nga nasapwan ang iya utod sa sulod sang iya balay nga wala na sang kabuhi kag madamo sang igo sang bala sa nagkalain-lain nga bahin sang iya lawas kag yara na sa advanced stage of decomposition.
Bangud sa kahimtangan sang bangkay, nabalaka ang pamilya nga mahimo sila nga balusan sang mga suspect rason nga wala na nila gin-report ang insidente sa mga otoridad kag ginlubong nalang ang bangkay sa mismo nga adlaw nga nasapwan ini.
