Aminado ang Hinobaan Municipal Police Station nga case closed na ang pagpatay sang principal sa isa nila ka manunudlo sa Bilbao Uybico National High School kaupod ang bana sini kun sa diin nagpanginmatay man ang principal matapos ang krimen.
Suno kay Police Major John Ganzon, hepe sang Hinobaan Municipal Police Station, natapos na ang Scene of the Crime Operation (SOCO) ang pag-usisa sa mga pilas sang biktima kag mga ebidensya sa crime scene.
Madumduman nga ginluthang ni Warren Escosar ang manunudlo nga si Almarisa Aroy kag bana sini nga si Christopher Aroy sa sulod mismo sang school campus alas-8:30 kahapon sang aga.
Suno sa mga nakasaksi, may malip-ot pa nga baisay sa tunga nanday Escosar kag Mrs. Aroy tubtob gintiro sang principal ang bana gamit ang bitbit nga shot gun, kag ginlagas man niya ang nagdalagan nga maestra tubtob nalab-ot niya ini kag ginluthang man sa sulod sang isa ka classroom.
Nagbalik sa parking area ang suspetsado kag ginkwa sa nakapark nga Nissan Navarra ang cal. 45 pistol kag nagpanginmatay.
Santo sa resulta sang imbestigasyon sang SOCO, ang manunudlo ang nakaangkon sang igo sang bala sa liog kag nawala nga kamot samtang ang bana sini ang may-igo sa likod gamit ang shotgun.
Samtang ang principal ang may pilas sa baba kag naglapos sa ulo matapos nga gin-um-on sini ang cal. 45 pistol.
Aminado naman si Ganzon nga makabig na nga case closed ang kaso bangod wala naman sang mahimo mapasakaan sang kaso bangod patay na ang may kahimuan sang krimen.
Apang padayunon gihapon nila ang imbestigasyon kag pagtipon sang impormasyon natuhoy sa matuod nga ginhalinan sang insidente.
Ginalantaw na nila nga mahimo motibo sa krimen amo ang plano sang manunudlo nga pagfile sang reklamo angot sa sexual abuse batok sa principal.
Matapos ang pagtsekyar sa mga gamit sang mga imbulbado, ginpasalig man sang hepe nga ang personal nga mga gamit sang mag-asawa kag sang prinsipal ang igabalik man sa tagsa nila ka mga pamilya.
