Ginpahayag ni Police Lt. Col. Joem Malong, public information officer sang Regional Election Monitoring Action Center sang Police Regional Office – Negros Island Region, nga indi pa makabig nga election related incident ang nagluntad nga shooting incident sa ciudad sang Silay City, Negros Occidental, subong nga aga.
Sa interview sang Bombo Radyo kay Malong, hugot nga ginakondenar ni Police Regional Office- Negros Island Region, Regional Director Police Brigadier General Arnold Thomas Ibay ang natabo nga shooting incident.
Kaina sang aga, ginpaarakan sang luthang ang mga volunteers sang Team Ugyon samtang nagamonitor sa Team Asenso headquarters bangod sa report nga vote buying.
Duha ang kumpirmado nga patay samtang lima sang pilason.
Sa inisyal nga report ang isa ka biktima ang ginkilala nga si Rick Ortillano, residente sang Barangay Mambulac, Silay City, samtang ang suspetsado naman ang ginkilala nga si Arnie Benedicto, Punong Brgy sang Brgy Lantad.
Suno kay Malong, wala sang dapat nga ikabalaka bangod under control ang sitwasyon sa karun.
Nagpadulong mismo si Negros Occidental Police Provincial Office Director Police Col. Rainerio de Chavez sa area agud masiguro nga mahatagan sang husto nga proseso ang insidente.
Suno pa diri, indi mahalitan sang natabo nga pagpangluthang ang election process kag indi pa ini makabig nga election related incident samtang nagapadayon ang imbestigasyon.
