Naesturyahan na ang short term kag long term nga solusyon para sa mga evacuees sang paglupok sang bulkan Kanlaon pananglitan nga matabo ang major eruption.
Sang Biyernes nagpadulong sa ciudad sang La Carlota si president Ferdinand ‘Bongbong’ Marcos Jr, agud lantawon ang sitwasyon sang mga evacuees.
Nakighinon-anon ang presidente kaupod ang mga alkalde sang Local Government Units nga maapektohan kun magsaka sa alert level 4 ang status sang bulkan kag yara sanday Negros Occidental Governor Eugenio Jose ‘Bong’ Lacson, Vice Governor Jeffrey Ferrer, mga katapo sang Office of Civil Defense, Philippine Institute of Volcanology and Seismology, Department of Social Welfare and Development kag mga concerned agencies.
Suno kay governor Lacson, ang short term solusyon nga ila ginsturyahan amo ang angot sa pinansyal nga kinahanglanon agud igasto sa tanan nga evacuees kag amo dapat nga may yara sang special fund nga ibutang apang dapat pangitaan kun diin makuha sang pondo.
Sa long term solusyon naman dapat nga mapangitaan sang permanente nga relocation site ang mga evacuees ilabi na ang nagaistar sa sulod sang 4 km radius permanent danger zone.
Pahayag ni Lacson, nakita mismo sang presidente ang evacuees kag naluoy ini sa ila nga sitwasyon kag nagpasalig nga wala nagapabaya ang national government sa pagbulig.
