Nagpanawagan ang City Health Office sang Silay City sa mga Silaynon kag sa publiko nga gilayon magpa-laboratory test kun may ginabatyag nga hilanat agud mahibaluan kun ini ang dengue na.
Santo man sa datos sang CHO, padayon nga nagasaka ang kaso sang dengue sa bulan sang Setyembre.
Sa interview sang Bombo Radyo Bacolod kay Alan Rojo, Public Health Nurse 2 kag Dengue Coordinator sang ciudad sang Silay, ginpahayag sini nga ang delayed treatment sang Dengue ang posible magresulta sa kamatayon.
Suno kay Rojo, indi na paghulaton ang pila ka adlaw antes ipa-check up kun nagahilanat bangud posible nga isa na ini ka kaso sang dengue virus.
Ginpasalig man ni Rojo ang mga pumuluyo sang Silay nga indi magkabalaka sa balayran sa ospital bangud i-cover ini sang ciudad partikular na ang konsulta sa doctor, laboratory test, kag bulong.
