Ginpanaugan sang House Committee on Public Accounts sang show cause order si Silay City Mayor Joedith Gallego matapos nga wala ini magtambong sa inquiry angot sa iregularidad sa P1.1 billion loan sang ciudad.
Nagpadala sang excuse letter si Mayor Gallego kun sa diin nakasaad nga indi ini makatambong bangud may yara ini sang importante nga buluhaton nga may kaangtanan sa preparasyon sang evacuation pananglitan nga maglupok liwat ang Bulkan Kanlaon.
Apang wala nakumporme diri si Abang Lingkod Partylist Representative Joseph Stephen Paduano.
Suno kay Paduano, ang kaangay nga buluhaton mahimo lamang nga mabilin kadali sa mga salaligan sini sa ciudad sang Silay kag magtambong sa half day nga committee hearing agud nga masabat ang mga palamangkutanon sang komitiba angot sa proyekto.
Dugang pa sang kongresista nga madamo man sang flight padulong sa Manila kag pabalik sa Bacolod adlaw adlaw gani mahimo lamang ang alkalde sang Silay nga makabalik dayun.
Samtang ang showcause nga ginpanaog ang pagpanugyan sa kay Silay City Mayor Joedith Gallego nga magtambong gid sa inquiry sang House Committee on Public Accounts.
Samtang sa pihak nga bahin, ginaduso naman sang House Committee on Public Accounts ang disbarment batok kay Silay City Legal Officer Atty. Janus Jarder.
Ini matapos nga wala nagpadulong sa House of Representatives kasunod sang contempt order batok sa iya, subong man sa indi pagtuman sa mga mando ni Mayor Joedith Gallego nga magpaathag sa indi pagpakita sa Kongreso, kag sa indi pagtambong sa hearing.S
