Arestado ang isa ka lalaki sa ginpatigayon nga drug buy-bust operation sa entrance sang Mallery 2 Subdivision, Barangay Rizal, Silay City kagab-i.
Ginkilala ang suspek kay Mark Villaran, 36-anyos, single kag residente sang Antonio Luna Street, Barangay 1, Silay City.
Nakuha sa paghinakop ni Villaran ang 10 ka ice candy wrapper nga nagaunod sang suspected shabu kag 20 ka sachets kalakip na ang buybust item.
Ginakabig man sang Silay City Police Station nga isa ka high value individual si Villaran.
Ginabanta nagabug-at sang 1,112 grams ukon masobra isa ka kilo sang suspected shabu ang nakuha sa paghinakop ni Villaran kag ini ang ginabanta nagabalor sang P7,561,600.
Nakahunong sa karun si Villaran sa Silay City Police Station kag natalana nga magapangatubang sang kaso nga paglapas sa RA 9165 ukon Comprehensive Dangerous Drugs Act of 2002.
Nahibaluan nga kahapon sang aga, masobra duha ka kilo kag nagabalor sang P13.6 million nga suspected shabu man ang nakumpiskar sa Silay City.
Ginapanginbulahan sang alkalde sang syudad sang Silay ang mga kapulisan sa syudad kasunod sa madinalag-on nga buybust operation nga nagresulta sa pagkadakop sang tatlo ka high value individual kag pakompiskar sang dalagko nga balor sang illegal nga druga.
Sa interview sang Bombo Radyo Bacolod kay Mayor Joedith Gallego, nalipay ini nga aktibo ang kampanya sang mga kapulisan batok sa illegal nga druga sa syudad sang Silay kag ini man ang nakita nga solusyon nga masolbar ang problema sa illegal nga druga.
Suno kay Gallego, ginacongratulate sini ang mga kapulisan sa Silay City Police Station nga ginapangunahan ni Police Lt. Col. Mark Anthony Darroca.
Suno sa alkalde nagapasalamat siya sa aktibo nga kampanya batok sa illegal nga druga kag kinahanglan matapna ang problema agud wala na sang pamilya nga maguba bangud sini.
Suno pa kay Gallego kun wala na nakuha ang binulto nga shabu nagikan sa mga nadakpan wala ini makahibalo nga tuman na kalala ang problema sa illegal nga druga sa syudad sang Silay.
Suno sa alkalde nagkig-angot naman sa kabarangayan sa syudad sang Silay para sa orientation sa kampanya batok sa illegal nga druga.
Nagapanawagan man ini sa mga pumuluyo sang Silay City nga buligan ang mga kapulisan sa kampanya batok sa illegal nga druga kag matapna ang problema sang syudad sa illegal nga druga.
