Ginpasalig sang Silaynon nga yara sa Papua New Guinea nga wala sang napatay kag wala man sang dako nga damages sa pagtay-og sang 6.9 magnitude nga linog kaina sang aga.
Sa interview sang Bombo Radyo Bacolod kay Ramon “Monj” Leal Garay, Bombo International News Correspondent derekta sa Port Moresby, Papua New Guinea, ang linog ang nagluntad alas-6:04 sang aga, ukon alas-4:04 sang aga sa oras diri sa Pilipinas.
Ang epicenter sini ang yara sa isla sang New Britain nga may-ara sang bulkan, kag masami gid man nagalinog.
Ini ang 620km naman ang kalayuon sa Capital City nga Port Moresby, gani wala nila maayo nabatyagan ang pagtay-og.
Gilayon man nga nag-issue sang tsunami warning, apang ini ang madasig man nga ginbatak sang gobyerno.
Sa karun, wala paman sang mga reports nga may napatay ukon nasamaran, kasubong man dalagkuan nga infrastructure damages.
Dugang pa sini nga may group chat man sila nga mga Pilipino kag updated man ang mga ini gani gilayon mahibaluan kun may seryoso nga insidente.
