Nagpauli sang Silver kag bronze medal ang team sang Doña Monserrat Lopez Memorial High School sa Silay City sa 9th Innovation Technology Challenge nga ginpatigayon sa South Korea.
Sa interview sang Bombo Radyo sa coach sang team nga si John Andre Ramos, nabalik ang tanan nila nga sakripisyo sa pag-intra sa robotics competition.
Suno diri, bisan duha lamang ka semana ang ila preparasyon, nakakuha sila sa gihapon sang medal kag nahatagan sang dungog ang ciudad sang Silay, kag probinsya sang Negros Occidental.
Ang team ang may duha ka project nga gindevelop kun sa diin ang isa diri ang ginhuman nila sa sulod sang isa ka tuig samtang ang isa naman ang nahuman lamang sa sulod sang duha ka semana.
Suno naman kay Coach Jake Joaquin kaangay nga yara sila sa gihapon sa panganod kasunod sa ila nga kadalag-an.
Suno diri, madamo sila sang contest nga gin-intrahan tubtob nga makalab-ot sa international level.
Apisar sa kabudlayan, natapos ang ila project bangod sa kaalam sang mga kabataan.
Samtang, ginalakipan sang Grade 10 students sang Doña Monserrat Lopez Memorial High School, nga naga-edad sang 15 kag 16 ka tuig ang nagdaog sang silver kag bronze medal sa 9th Innovation Technology Challenge nga ginpatigayon sa South Korea.
Suno kay Akysha Nicole Grande, wala ini naglaum nga makalab-ot sa international level ang pag-intra sini sa competition.
Tuman ang pagpasalamat sini nga wala lamang sila nakilala locally apang nakalab-ot na sila sa international stage.
Suno naman kay Lyn Piedad, indi pa ini sa gihapon makamove-on sa competition.
Suno diri, tuman ang iya kalipay nga mashare ang ila ideya sa international level.
Wala naman nangin mahapos ang journey sang team sa pagdaog sa competition.
Suno kay Jorge Nathalie Dequilla, tuman kabudlay ang ila nga naagyan apang mas dako ang nagbalik sa ila.
Dako naman ang pagpasalamat ni Lettynia Mellisze Sorongon nga madamo ini sang natun-an kag nakita sini ang importansya sang research.
Suno diri, wala sini sadto nakita ang iya kaugalingon bilang robotics inclined student apang nakita sini nga madamo sang matun-an ini ang iya madala bisan diin man ini magpadulong sa pagpangabuhi.
