Nagpatigayon sang isa ka pinasahi nga mass wedding ang isa ka simbahan sa ciudad sang Talisay, probinsya sang Negros Occidental.
Sa interview sang Bombo Radyo kay Joemarie Marcelino, family and life coordinator sang St James the Greater Parish Church, napulo tanan ka couple nga ginkasal sang Hulyo 25 kadungan sang selebrasyon sang kapiyestahan sang simbahan.
Suno diri, naghatag sang libre nga kasal ang simbahan bilang regalo sini sa komunidad.
Bangod nga kalabanan sa mga pumuluyo sa lugar ang nagatrabaho bilang mangunguma kag pigado, nagdesisyon ang mga couple kag simbahan nga magpatigayon sang simple apang pinasahi nga wedding.
Ginhatagan sang kahigayunan ang mga couple nga magpili sang ila bridal vehicle nga masarangan lang nila.
Iban sa ila ang nagsakay sa salakyan, tricycle, motorsiklo kag karo nga ila gindisenyohan.
Naghatag man ang simbahan sang premyo sa nagdaog nga may manami nga dekorasyon nga bridal vehicle.
Samtang, iban sa mga couple ang may edad na, may yara man sang lamharon pa, may yara sang nagabusong kag may yara man sang may pila na ka kabataan.
