Nangin labing una nga Santo Papa nagikan sa Estados Unidos si Cardinal Robert Francis Prevost, nga nagpili sang papal name nga Leo XIV matapos siya ang gin-eleher sang 133 ka mga cardinals bilang pinuno sang kapin 1.4 billion Catholics.
Linibo nga mga tumuluo ang nagbantay sa St. Peter’s Square kag nagcheer kadungan sang pagwa ni Prevost sa balcony sang St. Peter’s Basilica samtang nagawave, nagayuhom kag nagabow.
“Peace be with you” ang una sini nga ginsambit sa crowd.
Ini matapos nagwa ang puti nga aso sa chimney sang Sistine Chaper sa ikaduha nga adlaw sang pagboto sang mga cardinals sa secret conclave.
Ginpabagting naman ang mga bells sa St. Peter’s Basilica kag mga kasimbahanan sa palibot sang Rome.
Ang bag-o nga Santo Papa, nga nagbulos kay Argentine reformer Pope Francis, ang gin-introduce bilang ika-267 nga pinuno sang Simbahan sa lingwahe nga Latin paagi sa iya ginpili nga papal name.
Sa labing una nga “Urbi et Orbi” to the city (of Rome) and to the world ni Pope Leo XIV, ginpasalamatan sini si Pope Francis kasubong man ang iya mga utod nga cardinals nga nagpili sa iya.
Ang 69-anyos nga Santo Papa ang labing una nga American nga gin-eleher sa pwesto apisar nga siya ang ginakonsiderar nga isa ka cardinal nagikan sa Latin America bangud sa malawig nga tuig nga pagserbi sini bilang missionary sa Peru, antes nangin isa ka bishop.
Siya ang ginbun-ag sa Chicago sang 1955 sa Spanish kag Franco-Italian descent.
Nagserbi ini bilang isa ka altar boy kag gin-ordinahan bilang pari sang 1982.
Apisar nga nagsaylo ini sa Peru pagkatapos sang tatlo ka tuig, regular ini nga nagapauli sa Estados Unidos bilang magserbi bilang isa ka pastor kag isa ka prior sa iya home city.
