Magatakop na subong nga adlaw, Hunyo 27 ang Simulation Exercise (SimEx) nga ginapatigayon sang Land Transportation Franchising and Regulatory Board sa ciudad.
Suno kay Atty. Salvador Altura, tagpamaba sang LTFRB Region 6, nagsugod sang Domingo ang tatlo ka adlaw nga simulation exercises sa 24 ka mga updated routes sa Bacolod nga yara sa idalum sang Local Public Transport Route Plan (LPTRP).
Suno kay Altura, tinutuyo sini nga mahibaluan kun sarang nga macater sang modernized jeepneys kag traditional jeepneys nga may provisional authority ang mga nagacommute sa ciudad.
Suno sa iya, 50 tubtob 60 ka porsyente sang transport group kag public utility jeepneys sa ciudad ang nakigbahin sa SimEx sa sulod sang duha ka adlaw.
Suno diri, naghatag sila sang numero agud ma-accout kun pila ang nagpartisipar kag ay iban nga wala nagkuha ukon wala nakahingagaw apang ginpahanugutan lamang sa gihapon nga magbyahe basta kumpleto ang ila papeles kag sa LPTRP route sila magabyahe.
May yara lamang sang magamay nga issue suno kay Altura kun sa diin may mga drivers nga ginpapauli bangud peke ang papeles kag wala sang driver’s license.
Nahibaluan nga kapin 900 ka mga traditional jeepneys ang nakabaton sang provisional authority samtang 555 naman ka mga modernized jeepney ang nagabyahe sa ciudad.
Nagalaom si Altura nga makasarang ang mga ini nga magtukod sang kooperatiba agud makaangkon sang bug-os nga oportunidad nga makigbahin sa modernization.
