Ginkanselar ni Education Secretary Sonny Angara ang Nationwide Simultaneous School Safety Drill for Active Attack Incidents nga gintalana kuntani sang Department of Education (DepEd) sa bwas, Agusto 25.
Sa interview sang Bombo Radyo Bacolod kay DepEd Negros Island Region Spokesperson Almyr Ceazar Dequinia, nagahulat lamang sila sang official notice gikan sa DepEd Central Office.
Pasalig sini nga ang DepEd NIR ang magarelay man sa mga DepEd Division nga ila nasakupan.
Sa pihak sang kanselasyon sang Active Shooter Drill, padayun gihapon ang mga inisyatibo sa tagsa ka buluthuan sa mas hugot nga safety measures.
Suno kay Dequinia, sa mga natabo na nga school shootings sila ang naga-upod sa kalisod sang pamilya sang biktima.
Ini ang rasun man kun ngaa indi pwede nga mangin complacent ang eskwelahan.
Suno diri, may-ara sang mga safety measures nga ginatuman ang mga eskwelahan agud maseguro ang safety kag security sa eskwelahan.
Pahanumdom sini sa mga DepEd Division Offices nga seguruhon nga ang mga eskwelahan ang may koordinasyon sa local government units (LGUs) kag sa law enforcement agencies.
Suno diri, ang pag-address sa school violence ang nagakinahanglan sang whole of community approach.
Angot naman sa nagakabatun nga school threat, ginaseguro sini nga ginakonsiderar nila nga seryoso ang mga pagpamahog.
Samtang, panawagan naman sini sa ginikanan nga estoryahon ang mga kabataan kag indi lamang ang academic performance ang hibaluon, kasubong man ang psychological status sang mga kabataan.
