All set na ang simultaneous inoculation sang COVID vaccine sa napulo ka vaccination centers sa ciudad sang Bacolod nga patigayunon bwas.
Suno kay Bacolod City Councilor Renecito Novero, chairman sang vaccination centers team sang Bacolod COVID Vaccination Council, napulo ka barangay health workers ang magapabakuna sa napulo ka vaccination centers ukon kabug-usan nga 100.
Ini ang magasugod alas-8:00 sa aga tubtub alas-12:00 sa udto.
Ang simultaneous inoculation ang patigayunon sa gymnasium sang Barangay Handumanan, Barangay 39, Banago Elementary School 1, Barangay Granada, Mansilingan Agro-Industrial High School, Punta Taytay, Pahanocoy, Taculing-Gonzaga gym, Barangay Alijis kag Andres Bonifacio Elementary School 1.
Ang mga barangay health workers ang naga-edad sang 18 tubtub 59 bangud Sinovac vaccines ang itublok sa ila.
Ang Sinovac vaccines nga gamiton bwas ang gindugang sang Department of Health sa una nga batch sang bakuna nga ginhatag sa ciudad sang Marso 5 para sa mga medical workers sa mga ospital sa Bacolod nga naubos na administer.
Suno kay Novero, ang simultaneous inoculation bwas ang kabahin sang programa sang city government agud maengganyo ang mga residente nga magpabakuna batok sa coronavirus.
Ang mga recipients ang ginpili sang COVAC council samtang ang iban ang nagvolunteer man nga mapabakuna.
