Nagalaom ang mga pumuluyo sa Barangay 16, ciudad sang Bacolod nga magapatunga ang Department of the Interior and Local Government agud nga matumod kun sin-o gid ang magapungko nga punong barangay sang ila barangay.
Ini matapos nga nagbalik sa trabaho si Punong Barangay Joseph Delos Santos bisan ginsuspend siya liwat sang Sangguniang Panlungsod samtang nagaduty man si acting Punong Barangay Stella Dela Pena.
Suno kay Rudy Distor, nagalibog ang ulo sang mga residente bangud duha ang punong barangay kag sila ang nagasala kun sin-o ang mapirma kun may pilirmahan.
Bangud sini, indi lang sila anay magproseso bangud wala sila nakahibalo kun sin-o ang may puder nga magtindog bilang punong barangay.
Suno diri, kuntani isa lang ang punong barangay kag ang Department of the Interior and Local Government ang makadesisyon angot diri.
Samtang wala pa sang desisyon suno sa iya, sila ang magahulat sini apang ang mabudlay amo ang paghulat sa wala.
Para kay Distor, wala ini nanamian kay De Los Santos bangud kun maayo ini nga punong barangay, kuntani wala ini nasuspend.
Suno kay Distor, maayo magserbisyo si Dela Pena bangud aktibo ini sa pagdumala.
Si Distor ang ginbun-ag sa Barangay 16 kag wala ini nanamian sa natabo bangud ini ang labing una nga kahigayunan nga may duha sila ka punong barangay.
Suno naman kay Vice Mayor El Cid Familiaran nga amo man ang presiding officer sang City Council, ang suspension ni De Los Santos ang desisyon sang quasi-judicial body nga amo ang Sangguniang Panlungsod gani ini ang executory.
Suno kay Familiaran, natapos na ang preventive suspension ni De Los Santos apang nagbalik ini sa trabaho bangud suno sa iya, wala pa niya nabaton ang suspension order nga pirmado sang alkalde.
Suno sa bise alkalde, nabaton ni De Los Santos ang suspension order nagikan sa Sangguniang Panlungsod apang wala niya ini ginsunod bangud wala sang pirma ni Mayor Alfredo Benitez.
Suno kay Familiaran, sala ang interpretation ni De Los Santos bangud ang una nga order nagikan sa alkalde ang para sa preventive suspension samtang ang order naman sang SP ang bangud sa mga lapses sini nga ulihi nga nakomiter sa barangay.
Sarang naman sila nga makahingyo sang assistance sang DILG agud nga maklaruhan ang tanan.
