Yara na sa heightened alert status ang Disaster Risk Reduction and Management Office (DRRMO) sa syudad sang Sipalay sa posibilidad sang pagbaha kadungan sang manugsulod nga bagyo sa Philippine Area of Responsibility.
Suno kay Sipalay City DRRMO Head Councilor Dionilo Bogtae, nakareport sang pagbaha kahapon sa Sitio Giwanon, Barangay 4, Sipalay City, apang pasalig sini nga madasig man nagkulpa ang tubig-baha.
Nagdangat sa tatlo ka oras ang wala sang untat kag mabaskog nga pag-ulan sa Southern Negros Occidental nga gintunaan sang pagbaha sa nasambit nga lugar.
Nagapadayun man ang hugot nga pagmonitor sang mga ini sa Sipalay River kasubong man Taw-angan River nga santo sa monitoring kahapon, yara pa gihapon sa normal ang lebel sang tubig.
Napaandaman naman sang mga ini ang nagapuyo sa mga coastal barangay nga mangin alerto.
Pasalig naman ni Bogtae nga nakahanda na ang mga floating assets sang Sipalay CDRRMO inkaso nga kinahanglan nga magresponder sa mga pagbaha kag on-standby naman ang mga personnel.
Una naman nga nag-abiso ang CDRRMO sa mga nagapuyo sa higad sang suba kag sa coastal barangay nga magpahibalo sa sitwasyon, magpanilag kag mangin alerto.
