BACOLOD CITY — Gindagdagan sang 90-day suspension sang Sandiganbayan 4th Division ang alkalde sang ciudad sang Sipalay nga si Oscar Montilla Jr.
Sa tatlo ka pahina nga resolusyon, ginmanduan ang alkalde nga mag-untat sa paghimo sang iya mga obligasyon kag magbaton sang anu man nga benepisyo sa sulod sang tatlo ka bulan bangud sa paglapas sa Section 13 sang Anti-Graft and Corrupt Practices Act (Republic Act No. 3019).
Ini bangud ginpaboran sang korte ang mosyon sang prosecution nga i-suspend ang opisyal samtang pending ang iya kaso kriminal.
Ang kaso ni Montilla ang nag-ugat sa sulit-sulit nga indi pagtuman sa order sang Ombudsman nga i-suspend ang lima ka mga empleyado sang city hall.
Nahibaluan ang mga empeleyado nga sanday Evangeline Seneres, Eva Sabusap, Fernando Balhin, Noel Villanueva kag Renato Manilla ang nagapangatubang sang kaso sang 2001 bangud sa overpriced medicines kag medical supplies.
Natalana naman nga igaserbe sang Department of the Interior and Local Government ang suspension order batok kay Montilla.
