Padayon nga gina-asikaso ang papeles para mapasakaan sang kaso kag maaresto ang amay nga gina-alegar naghimulos sa iya lima ka kabataan nga babayi sa Barangay Nabulao, Sipalay City.
Sa interview sang Bombo Radyo kay Police Lt Col Fernando Somblingo, acting chief of police sang Sipalay City Police Station, ginahulat pa sa karun ang resulta sang medico legal sang biktima agud mapamatud-an ang gina-alegar nga pagpanghimulos.
Ang duha ka mag-utod nga naga-edad sang 25 kag 27 anyos ang nangisog nga nagreklamo kag nangayo sang bulig sa otoridad.
Ang suspetsado ang isa na ka senior citizen, mangunguma apang kun kaisa nagapamulawan man, bangod sila ang malapit lamang sa minahan.
Suno sa mga biktima, sila ang 12 anyos pa lamang sang ginalugos sang ila amay.
Sila ang ginasugo kaangay sa paglawig sang karbaw, magpangahoy kag iban pa, apang sa tion nga malayo na sa balay, didto na ginahimo sang amay ang sexual harrassment.
May unay man ini nga binangon nga gina-aman bilang pagpamahog nga hinali sila ang manugid sa iloy ukon kay sin-o paman, sila tanan ang iya pagapatyon.
Apisar sini ginpahayag sang mga kabataan nga sila ang nagapanugid sa iloy apang ini ang indi magpati.
Tanan nga mga kabataan ang lunsay nakapamana na kay pila sa ila ang nagsipak naman sang balay.
Ginpahayag sang mga biktima nga ang pinakaulihi nga insidente sang pagpanghimulos ang natabo sa nakaligad lamang nga tuig sa pinakabata sa mga biktima, kag ini ang iya ginahimo apisar may bana na ang iya nga bata.
Suno kay Somblingo, yara na sa kustodiya sang DSWD ang mga kabataan apang wala ginpahibalo kun diin ginpatinir ang mga ini para sa ila nga safety.
