Ginpasalig sang site supervisor sa Bacolod City Public Plaza nga madamo sang nagabantay sa seguridad sang lugar subong nga Masskara Festival 2023.
Sa interview sang Bombo Radyo Bacolod kay Christopher Mallo, wala sila sang may nabatun nga issues gikan sa mga concessionaires kag kun may-ara man sang gamay nga problema, gilayon nila ini nga ginarepondihan agud indi na magdako.
Sa pihak nga bahin, kun may-ara naman sang magamaoy, gilayon man sila magatawag sang kapulisan agud makontrolar ang nasambitan nga persona.
Ang kapulisan nga nakadeploy sa area kada gab-i ang nagadangat sa 40 tubtob 65 kag sila ang nagatinir tubtob alas-3:00 sa kaagahon sa tion naman sang pagpanarado sang mga kiosko.
Magluwas sa kapulisan, sila ang naghingyo man sang bulig gikan sa volunteer group nga The Guardians, agud maseguro ang kalinong kag katawhayan sa Bacolod City Public Plaza.
Pasalig ni Mallo nga sila ang masami man nga nagalibot sa site agud maseguro nga nagakatuman ang implementasyon sang sanitation.
May-ara man sila sang grupo nga nagaseguro nga matinlo ang Bacolod City Public Plaza partikular na ang mga portalet.
Paathag sini nga dapat nga mapabilin nga matinlo ang plaza agud indi man mahuy-an si Bacolod City Mayor Alfredo “Albee” Benitez sa mga bisita.
Ginapakamaayo man sini nga masarangan lamang ang presyo sang mga pagkaon sa plaza kun sa diin bisan pa nag-inulan sang tinalikdan nga inadlaw, wala gihapon napunggan ang pagdugok sang publiko.
Pahanumdom naman sini sa mga concessionaires nga tubtob lamang sa alas-2:00 sa kaagahon ang ila nga operasyon sa week days gani dapat nga mapaathag na sa customers nga last order na ang ala-1:00 sang kaagahon.
Kun may-ara sang concern, panugyan naman ni Mallo nga magpadulong lamang sa ila nga opisina sa Bacolod Arts and Youth Sports (BAYS) Center.
Aminado man ini nga mahimo siya ang indi makit-an sa opisina bangod masami ini nga nagalibot sa iya area of responsibilities apang ang concerns ang mahimo man nga ipalab-ot sa iya nga mga staff agud mapalab-ot sa iya.
