Nagpatigayon ang team sang Department of Human Settlements and Urban Development (DHSUD) kaupod ang personnel sang provincial government sang Negros Occidental sang inspection sa mga lugar nga butangan sang permanente nga relocation site para sa mga residente nga maapektuhan sa paglupok sang Bulkan Kanlaon.
Sa interview sang Bombo Radyo Bacolod kay Donato Sermeno, regional director sang Office of Civil Defense-Negros Island Region, ginpadulungan sang team ang banwa sang La Castellana agud inspeksyunon ang lugar nga butangan sang permanent relocation site.
Ini agud nga masiguro nga hilway na sa tion nga liwat maglupok ang Bulkan Kanlaon.
Pagkatapos sang site visit ang tagsa ka ahensya sang gobyerno nga nagabug-os sang Technical Working Group ang magapasa sang report sa National Task Force Kanlaon (NTFK) agud nga mapadasig ang pagpatuman sang Kanlaon Recovery and Development Plan (KRDP).
Samtang, nakapauli na sang Huwebes ang 61 ka pamilya sa La Carlota City, Negros Occidental nga nag-evacuate bangud matapos ang paglupok sang Bulkan Kanlaon.
Ang nasambit nga mga residente ang nagapuyo sagwa sang 4 kilometers permanent danger zone sang nasambit nga Bulkan.
Suno kay Sermeno, subong nga adlaw, Sabado, magapauli na 22 ka pamilya nga mga evacuees nagikan sa Bago City.
Suno diri, ang mga nabilin nga Internally Displaced Persons ukon IDPs ang 61 ka pamilya nga nagikan sa La Castellana kun sa diin nalakip sa nasambit nga numero ang mga nagapuyo sa sulod sang 4 kilometers permanent danger zone sang Bulkan Kanlaon.
Samtang sa Canlaon City may yara sang 16 ka pamilya nga nabilin sa duha ka evacuation centers sang ciudad.
Dugang pa sini nga ginbisitahan man sang Technical Working Group nga ginabug-usan sang Department of Human Settlements and Urban Development (DHSUD), PHIVOLCS, DILG kag iban pa ang apat ka mga lugar sa La Carlota City nga ginapropose man nga butangan sang permanent relocation site agud masigur nga safe ini gikan sa paglupok sang Bulkan Kanlaon.
