Ginahulat na lamang sang kapulisan ang go signal gikan sa attending physician agud maesturya ang apat ka tuig nga lalaki nga ginlamposan sang bato sa Hacienda Badiang, Brgy. E. Lopez, Silay City.
Sa interview sang Bombo Radyo Bacolod kay Police Captain Judesses Catalogo, spokesperson sang Special Task Group – Bornales, wala pa sa karun sang may ginakonsiderar nga makabig nga eye witness sa natabo para magtumod kun sin-o ang suspek.
Suno diri, kun makahatag sang testimoniya ang apat ka tuig nga lalaki, ini dako gid nga bulig sa lakat sang imbestigasyon apang ginakonsiderar man sang kapulisan ang ikasarang sang bata.
Suno kay Catalogo, mahimo nga maka-apekto sa emosyon kag sa paminsaron sang bata kun mag-esturya ini sa natabo sa ila bangod sa trauma nga iya naagyan.
Ginahulat nila sa karun ang go signal halin sa attending physician kun pwede na maesturya ang bata bangod dapat nga makuha ang iya testimoniya nga indi maka-apekto sa iya.
Pahayag ni Catalogo, wala pa sang identity kun sin-o ang suspek apang nagapadayon ang imbestigasyon sang SITG.
