Nagpatigayon sang meeting ang Special Investigation Task Group (SITG) – Bornales kaina sang aga para sa madalom nga pag-imbestiga sa pagpanglampos sang bato sa tatlo ka mag-ululutod nga menor de edad sa Hda. Badiang, E lopez, Silay City.
Madumduman nga napatay ang siyam ka tuig nga bata nga babayi matapos ginlampusan sang bato sa ulo kag likod samtang kritikal naman ang 15 anyos nga babayi nga nabuka ang panga kag estable na ang kondisyon sang apat ka tuig nga lalaki.
Sa interview sang Bombo Radyo Bacolod kay Negros Occidental Police Provincial Office Spokesperson Police Captain Judesses Catalogo, ang SITG commander amo si Police Col Dennis Wenceslao samtang anng lead investigator naman amo ang mga imbestigador sang Silay Component City Police Station kag kaupod man diri ang legal team, forensic unit sang Scene of the Crime Operations kag iban pa.
Suno diri, mas bentaha kun may yara sang SITG nga gintukod agud mas madamo sang nagaggiyo para sa kaso.
Sa karun, ginahulat na lamang ang resulta sang DNA Swabbing gikan sa dugo sa duha ka bato nga gingamit lampos sa mga bata kag may ginkuha man nga specimen sa mga biktima agud mahibaloan kun bala nagbato pa ang mga bata sa suspek.
Samtang, maayo na ang kondisyon sang duha ka bata nga yara sa ospital kag ginahulat na lamang nga pahanugotan ang mga imbestigador nga maesturya sila.
May yara naman sang ginakabig nga persons of interest sa kaso kun sa diin nalakip diri ang residente lamang sa lugar.
Pahayag ni Catalogo, wala pa matumod kun ano ang motibo sa krimen tubtob nga makumpirmar na kun sin-o ang mga suspek.
