Nagtukod sang Special Investigation Task Group (SITG) ang Negros Oriental Police Provincial Office (NORPPO) nga magaimbestigar sa pagtiro-patay sa American marine scientist nga si Dr. Kent Carpenter kag gin-alegar paghimulos sa iya Pinay nga live-in partner sa Sibulan, Negros Oriental sang Domingo, Hulyo 12.
Sa interview sang Bombo Radyo Bacolod kay Police Captain Stephen Police, spokesperson sang Negros Oriental Police Provincial Office, nagtukod sang SITG para sa imbestigasyon sang kaso bangud isa sa mga biktima ang foreign national.
Suno kay Polinar, sa inisyal nga imbestigasyon nagalantaw sang TV si Carpenter sang ginsulod sang wala matumod nga mga suspetsado ang ila balay kag gintiro ini sa ulo kag ginkuha ang mga mapuslan nga pagkabutang.
Gin-alegar nga biktiman man sang sexual assault ang 34 anyos nga live-in partner sang biktima nga sa karun yara sa protective custody sang Women and Children Protection Desk.
Ginalantaw nga motibo sa krimen ang pagpangawat.
Sa karun nagapadayon ang mga otoridad sa ila ginapatigayon nga imbestigasyon sang mga otoridad agud nga matumod ang motibo kag suspetsado sa krimen.
Nahibaluan, si Dr. Carpenter ang kilala nga marine scientist nga nagapatigayon sang mga pagtuon angot sa fish biodiversity kag nagserbe adjunct professor kag researcher sa Silliman University.
Siya man ang biological sciences professor sa Old Dominion University sa Norfolk, Virginia, humalin sang 1996.
