Padayon pa ang pagtipon sang impormasyon sa pagkilala sa tatlo ka iban pa nga suspek sa pagpaarak sang luthang sa siyam ka mga lalaki sa Sitio Ipil-Ipil, Brgy Mambulac, Silay City, sang Mayo 12.
Madumduman nga ang miyembro sang Team Ugyon ni Silay City Mayor Joedith Gallego ang nagabantay sa gwa sang ginagamit nga balay sang Team Asenso bangod sa report sang lapnagon nga vote buying.
Apang, ginpaarakan ni Punong Brgy. Arnie Benedicto sang Brgy Lantad ang siyam ka tawo kun sa diin duha diri ang napatay.
Ang mga napatay ang ginkilala nga sanday Albert Salimbot, yara sa legal nga edad, residente sang Hda. Macamig Pulo, Brgy E. Lopez kag Ronnie Piedad, 45 anyos, residente sang Zone 7, Purok Ipil-Ipil, Brgy Mambulac, Silay City
Sa crime scene may apat ka nagkalain-lain nga basiyo sang bala nga nakit-an kag kun sa diin magluwas kay Benedicto, may yara pa sang tatlo ka suspek nga nagbulig man luthang sa mga biktima.
Sa interview sang Bombo Radyo Bacolod kay Negros Occidental Police Provincial Office Spokesperson Police Captain Judesses Catalogo, nagatipon pa sila sang impormasyon kag witnesses nga makahatag sang dugang nga detalye para makilal-an ang mga suspek.
Suno diri, may yara pa sang mga biktima nga nagapabulong sa ospital kag ginahulat na lang kun san-o sila makuhaan sang impormasyon.
