Na-activate na kahapon ang special investigation task force sang Negros Occidental Police Provincial Office nga magatutok sa kaso sang tatlo ka mga bangkay nga nasapwan sa ciudad sang Talisay.
Madumduman nga asod-asod nga nasapwan ang mga bangkay sang Agosto 11.
Alas-2:20 sang kaagahon, may nakit-an nga motorsiklo kag helmet sa kilid sang kakampuhan sa Hacienda San Isidro, Barangay Concepcion kag sang gintsekyar didto na nasapwan ang bangkay sang isa ka lalaki.
Alas-9:00 sang aga, nasapwan ang ikaduha nga bangkay nga nagaka-agnas na sa Hacienda Minuluan Mendoza, Barangay Matab-ang.
Kag alas-2:00 sang hapon, may isa pa gid ka bangkay nga nasapwan kalapit lamang sa una nga bangkay.
Isa sa duha ka biktima sa Brgy Concepcion ang nakilala nga si Mars Relles, 48-anyos, residente sang Purok Pedring, Barangay Estefania, Bacolod City.
Sa interview sang Bombo Radyo Bacolod kay NOCPPO Spokesperson Police Captain Judesses Catalogo, wala pa gihapon nakilala ang isa ka bangkay sa Brgy Concepcion, apang nagapati ang mga ini nga kilal-anay ang duha ka biktima.
Ginalantaw naman ang posibilidad nga wala sang kaangtanan sa duha ang nagaka-agnas na nga bangkay sa Brgy Matab-ang nga ginalantaw napatay bangod sa natural causes.
Sa karun, wala pa sang pamilya nga nakadangop sa Talisay City Police Station agud magtsekyar kun ila nga pamilya ang duha ka bangkay nga wala pa sang identity.
Padayun man ang pagtumod sa matuod nga rasun sang kamatayon sang mga biktima, kag ang motibo kag may kahimuan sa krimen.
