Nagbalik na sa normal ang sitwasyon sa Barangay Buenavista, Himamaylan City, duha ka semana matapos ang pagmassacre sa Pamilya Fausto sa Sitio Kangkiling kun sa diin apat ang napatay sang Hunyo 14.
Sa interview sang Bombo Radyo kay Barangay Kagawad Arlene Entirro, matawhay na ang sitwasyon sa ila barangay bangud nagalibot ang mga suldado.
Nakit-an man sang mga pumuluyo nga nagaroving ang isa ka platoon sang militar gani ila mabatyagan nga ginatsekyar ang sitwasyon sa Barangay Buenavista.
Suno kay Entirro, mas secure ang ila pamatyag kun ara ang mga suldado kun sa diin may mga inoras nga ara sila sa plaza nagatinir gani makaresponde sila gilayon kun kinahanglan.
Ang mga tupad balay nanday Rolly kag Emilda Fausto ang nakahinambit nga likawan nila ang pagtulog sa lugar kun gab-i apang iya ini igamonitor bangud ginpahayag ini sang pamilya sang bag-o lang natabo ang massacre.
Gin-ako ni Entirro nga tuman ang kasubo sa ila nga barangay sang bag-o lang natabo ang massacre apang amat-amat na nagbalik ang kabakod sa tagsa-tagsa bangud ila naappreciate ang pag-roving sang militar kag nagapatigayon sang pulong-pulong sa mga purok.
Bilang barangay official, ginpasalig ni Entirro nga nakahanda sila nga magbulig sa mga pumuluyo nga nagakinahanglan gani gin-engganyo sini ang mga kasimaryo nga makig-angot lang sa ila.
