Igapalab-ot sang chairman sang Committee on Education sa Sangguniang Panlungsod kay Bacolod City Lone District Congressman Greg Gasataya ang sitwasyon sang mga classrooms nga guba matapos ini naglibot kahapon sa mga buluthuan sa ciudad kadungan sang pagbukas sang klase.
Sa interview sang Bombo Radyo kay Councilor Al Victor Espino, naglibot ini sa mga buluthuan sa Barangay Villamonte kag nakit-an nga maayo kag excited ang mga manunudlo kag mga estudyante.
Sa kabug-usan nga mga enrollees sa mga eskwelahan sa nasambit nga barangay, 45 lamang ka mga estudyante ang wala nagtambong kahapon apisar nga malain ang tiyempo.
Pagkatapos sini libot, iya gilayon nga ginreport kay Mayor Alfredo Beniteza ang sitwasyon kasubong man ang mga reklamo nga iya nabaton.
May mga classrooms suno sa iya nga nagatulo ang atop, may yara man sang gabok na ang salog kag may ginkadtuan man si Espino nga eskwelahan nga may anum ka mga classrooms nga gin-abadonar kag wala gin-usar.
Suno diri, magapalapit ini kay Congressman Gasataya agud mahatagan sang pondo sa masunod nga tuig ang mga eskwelahan bangud kadamo pa gid sa gihapon sang mga deficiencies ilabi na sa mga daan nga mga buluthuan.
Kampante man ang konsehal nga magaresponde si Gasataya kag bangud nga kabahin man ini sang Committee on Appointment sa Kongreso, may posibilidad nga marespondehan gid ang problema.
Gindugang man sini nga ginatinguhaan gid nga mahatagan sang kahilwayan ang mga kabataan kag mga ginikanan kun magbalik na ang full face-to-face classes sa bulan sang Nobyembre.
