Siyam ka mga persona ang nadakpan sa ginpatigayon nga joint drug buybust operation sang Philippine Drug Enforcement Agency (PDEA)-Negros Occidental, PDEA Antique, PDEA Guimaras kag San Carlos City Police Station sa isa ka drug den sa San Juan Tunga, Barangay 5, San Carlos City, Negros Occidental alas-11:41 sang Dominggo.
Ginpatigayon ang operasyon sa tinutuyo nga madismantle ang drug den nga ginamintinar ni Dominio Navales, 30 anyos, SLI, lalaki, single, wala sang trabaho kag residente sa San Juan Baybay, Barangay 6, San Carlos City, nga nag-ako nga tatlo na ini ka tuig sa negosyo.
Sa pagkadakop sa drug den maintainer, kalakip man nga nadakop ang walo ka mga nagagamit sang iligal nga droga nga yara sa drug den.
Ini ang ginalakipan nanday Joel Canaman, 44 anyos, street level individual kag residente sa Sitio Tunga, Barangay Palampas, San Carlos City; Juanito Manate Jr, 26 anyos, kag Anome Egonia alyas Rona Egonia, 40 anyos, nga lunsay mga residente sa San Juan Tunga, Barangay 5, San Carlos City.
Arestado man sanday Perlyn Mahinay, isa ka tricycle driver kag residente sa Campo Siete, Barangay 5, San Carlos City; Bonifacio Jamili alyas Joseben, kag residente sa San Juan Bonifacio, Barangay 5, San Carlos City, kag Dari Jayn Nacarro, 34 anyos, isa ka manunudlo nga residente sa 4th Street, Margarita Subd., Barangay 2, San Carlos.
Dakop man sanday Encarnacion Siaboc, 25 anyos, kag residente sang Burgos, Barangay 6, San Carlos City kag Leslie Luague nga residente sang Phase 3, Barangay Rizal, San Carlos City, Negros Occidental.
Suno kay PDEA Negros Occidental Head Nicholas Gomez, apisar nga tatlo na ka tuig nga nagaduso sang iligal nga droga si Navales, pila palang ini ka bulan nga ginamonitor sang otoridad.
Matapos mabaklan sang isa ka sachet sang suspected shabu, nakuhaan pa ang mga arestado sang tatlo ka gamay kag tatlo ka dalagko nga sachet sang suspected shabu kag mga drug paraphernalia.
Ang nakuha nga droga ang ginabanta 15 ka gramos sang supected shabu nga nagabalor P102,000.
Ang mga naaresto ang yara naman sa paghinakop sang San Carlos City Police Station kasubong man ang mga recoveries kag natalana nga kasuhan.
