Siyam tanan ka mga establisyimento sa Barangay Mansilingan, Bacolod City ang ginpasirado sang City Legal Enforcement Unit bangod nga wala sang business permit.
Sa interview sang Bombo Radyo kay City Legal Enforcement Head Rey Demisana, ang siyam ka mga establisyimento ang ginalakipan sang mga baligyaan sang lechon manok, ilimnon, kalan-an, batchoyan, laundry shop, chicken insal kag vape lounge.
Suno diri, makapila na nga beses nga ginpadal-an sang notice ang mga establisyimento kag lunsay mga rason sang mga ini amo nga ginaproseso ukon igaprocess pa nila ang ila mga business permit.
Ginalantaw naman nga indi lamang siyam ka mga establisyimento ang ipasira ilabi na nga may yara sang kapin 100 ka mga kandado ang ginpreparar santo sa lista sang mga establishemento nga ipasira.
Pahayag ni Demisana, kun nasirado na ang establisyimento indi ini pwede nga makabukas samtang wala sang business permit kag wala nabayaran ang ila business tax.
Igamonitor man ang mga ginpasira nga establisyimento samtang indi pa ini pwede makabalik sa negosyo.
Pahayag ni Demisana, indi na paghulaton pa ang notice kag pagpasira sang negosyo gani mas maayo nga iproseso ang business permit sang timprano.
