Siyam ka mga indibidwal ang na-rescue matapos nga magkapan ang ginasakyan nga bangka sa Barangay Tomongtong, EB Magalona kahapon.
Sa interview sang Bombo Radyo kay Coast Guard Chief Petty Officer James Comeros, Commander sang PCG Victorias Sub Station, naggikan sa ciudad sang Iloilo ang siyam ka mga indibidwal kun sa diin sila nagatrabaho kag mapadulong kuntani sa banwa sang Manapla para magpauli, apang alas-2:00 sang hapon, Pebrero 3, sila ang naka-encounter sang dako nga balod nga nagpakulob sang ila nga bangka.
Suno diri madugay na nga nagutaw-utaw sa tubig ang mga indibidwal sang sila ang ma-rescue alas-10:00 kahapon sang aga.
Sa karun yara na ang mga ini sa hilway nga sitwasyon kag nadul-ong na sa tagsa-tagsa ka mga puluy-an.
Pito sa mga diri ang residente sa banwa sang Manapla samtang ang duha naman ang residente sang Iloilo City nga amo ang nagdul-ong sa pito gamit ang isa ka pribado nga bangka.
