Siyam ka mga miyembro sang New People’s Army (NPA) lakip na ang duha ka mga high ranking NPA leaders ang arestado sa security operations nga ginpatigayon sang 62nd Infantry Battalion sa idalom sang 303rd Infantry Brigade kaupod ang 6th Special Action Force kag mga personnel sang Guihulngan City Police Station sa Brgy. Buenavista, Guihulngan City, Negros Oriental sang tinalikdan nga Domingo, Setyembre 20.
Sa interview sang Bombo Radyo kay 303rd IB commander Col. Inocencio Pasaporte, ginpahayag sini nga ila ginserbehan sang warrant of arrest ang duha ka mga high ranking NPA leaders nga sanday Nona ESPINOSA alyas Aba/ Gelay, Front Secretary sang Central Negros 1 kag Adidas Acero alyas Baldo/BJ, Vice CO sang Leonardo Panaligan Command; subong man sanday Lea Niles; Xian Flores; Rodrigo Benlot, Squad Leader sang CN1; Felix Policher, Pltn Medic sang CN1; Analyn Flores; Crispin Diano; kag Juravilla Baloy.
Suno kay Pasaporte, pila ka mga katapo sang NPA nga naaresto ang teenagers pa lamang.
Nakuha sa ila paghinakop ang nagkalain-lain nga mga armas luthang, mga bala kag granada; Land Bank savings passbook; duha ka libro sang National Democratic Front (NDF) manuals; dental instruments; mga dokumento kag personal nga kagamitan.
Suno kay Pasaporte, madugay na nga nadakpan si Nona Espinosa apang ila nahibaluan nga nagbalik nanaman ini liwat sa makawala nga grupo.
Suno diri, nagpatigayon ang tropa sang operasyon agud magserbe sang warrant kag gilayon nga naaresto ang siya ka mga miyembro.
