Nagapadayon pa ang search and rescue operation kag imbestigasyon sang Philippine Coast Guard kag mga kapulisan tuhoy sa gintunaan sang sunog sa isa ka passenger boat nga may sakay nga 135 ka mga persona sa Real, Quezon nagikan sa Polillo Island, kahapon sang aga.
Pito ka mga persona ang napatay samtang siyam ang missing matapos nasunog ang ila ginasakyan nga Mercraft 2.
Ang mga nadulaan sang kabuhi ang ginkilala sanday Viola Empreso; Marivic Samareta; Edna Balanac; Crisanto Debelles; Charito Escareses; Andy Tejares; kag Mina Enciso.
Sa inisyal nga report nga nabaton sang Philippine Coast Guard, nadulaan sang kabuhi ang mga biktima bangud sa suffocation samtang nagakasunog ang Mercraft 2 sa tunga sang lawod.
Pasado alas 5:30 sang aga sang naghalin ang nasambit nga vessel sa Polillo port sakay ang 125 ka mga pasahero kag siyam ka mga crew apang yara sa 1,000 metro pa lamang ang kalayuon sini sa Real Port, alas 6:30 sang aga, sang hinali lamang ini nga gintupok sang kalayo.
Gilayon nga naglangoy sa tubig ang mga pasahero suksok ang mga life vest sa kahangawa nga kaupod nga masunog sa passenger vessel.
Gilayon naman nga nagresponde ang mga katapo sang PCG, Real MDRRMO kag mga personnel sang Roro company agud luwason ang mga sakay sang nagakasunog nga passenger vessel kag ang mga nagalutaw sa tubig nga pasahero.
