BACOLOD CITY – Siyam naman ka mga pulis ang ginhingdlan ni Ricky Serenio nga nagabaton sang payola kag mga protektor sang ilegal nga droga sa probinsiya sang Negros Occidental kag ciudad sang Bacolod.
Ini ang kaundan sang supplemental affidavit sang bagman sang “Berya” drug group nga ginsumpaan sang Marso 10, 2017 kag pirmado ni Noel Darren Damian, Presiding Judge , Municipal Ciruit Trial Court Valladolid, San Enrique-Pulupandan Negros Occidental.
Ini ang ginalakipan ni Negros Occidental Police Provincial Office (NOCPPO) Director Senior Supt. William Señoron nga nagabaton sang ginabulubanta P1,200,000.00 nga monthly payola gikan sa mga drug lords sa bug-os nga probinsiya sang Negros Occidental.
Nalakip man sa listahan nga nagabaton sang tag-P80,000 sanday Supt. Orly Gabinete sang La Carlota City Police Station, Supt. Antonieto Cañete sang Himamaylan City PNP, Major Placedo Gentoleo sang Bacolod City Police Office (BCPO) Intel kag PO1 Eric Alcosaba sang police station 7.
Nagabaton naman sang monthly payola nga tag-P120,000 sanday SPO4 Reggie Antolin sang Bacolod CIDG kag Major Edison Garcia sang police station 2, kag tag-P200,000 naman ang ginabaton nanday Supt. Edel Manzano sang Cadiz City Police Station kag Renoli Bagayao sang Bacolod CIDG.
Magluwas sa mga ini nasaad man sa affidavit ni Serenio nga nagahatag man ang amo sini sang monthly payola duha ka agents sang National Bureau of Investigation (NBI) Bacolod nga sanday Agent Cyruz Aluzan nga nagabaton sang P80,000 kag Agent Boy Cabuyao nga P40,000.
Santo man sa supplemental affidavit ni Serenio kabahin sang masobra isa ka milyon ka pesos nga ginabaton ni Señoron ang tag-P120,000 monthly payola gikan kay Supt. Gabinete kag Cañete.
Samtang, wala pa sang matugda si Police Regional Office (PRO) 18 director chief supt. Renato Gumban sa nagkaulamid nga mga ngalan bangud nga wala pa sini nabasa ang supplemental affidavit ni Serenio.
Apang iya gin pasiguro nga iya ini pa-imbestigaran.
