Ginbawian na sang kabuhi ang siyam ka tuig nga bata nga lalaki nga ginbuno kaupod ang lolo sini sa Kalantas, Abada-Iskay, Barangay Vista-Alegre, Bacolod City kahapon sang kaagahon.
Sa interview sang Bombo Radyo Bacolod kay Police Captain Elmer Bonilla, station commander sang Bacolod Police Station 7 nagtawag sa iya ang iloy sang bata kahapon sang hapon nga napatay na ang biktima.
Ginahulat pa ang medical record sang bata agud makita kun pila ka bilog ang naagom sini nga pilas tuga sang pagbuno.
Ang bata ang ginbuno kaupod ang iya lolo nga si Aurelio Rull kag nabilin pa sa ulo sang senior citizen nga barangay tanod ang plamengko nga gingamit sang suspetsado.
Ginadula naman ni Bonilla ang pagpangawat nga motibo sa krimen, bangud wala man sang nadula nga kagamitan sa balay.
Suno kay Bonilla, may yara na sila sang persons of interest kag may nagtawag naman sa talatapan sini nga luyag nga mangin witness.
Ginalantaw sa karun nga may kaangtanan sa iligal nga druga ang pagpatay sa senior citizen nga biktima kun sa diin nadalahig ang siyam ka tuig nga bata nga lalaki.
Ginabanta nga alas-2:00 sa kaagahon natabo ang krimen.
Dead on the spot si Rull samtang gindala naman sa Corazon Locsin Montelibano Memorial Regional Hospital ang bata apang bangud nalab-ot sang kutsilyo ang iya utok, nangin brain dead ini tubtub nga nagtaliwan.
