Indi magnubo sa siyam ka tawo ang napatay matapos magluntad ang kinagamo sa Pakistan-administered Kashmir sang Martes samtang nagsaka ang tensyon angot sa isa ka malapad nga protesta padulong sa capital sang rehiyon nga Muzaffarabad.
Kalakip sa mga nautas ang kabuhi amo ang isa ka security personnel kag pito ka mga raliyista.
Temporaryo nga gin-untat ang rally bangud sa riot kag komprontasyon sa tunga sang mga security forces kag mga naga-protesta.
Suno sa mga opisyal, ginsalakay sang mga otoridad ang isa ka balay sa gwa sang Rawalakot town sa distrito sang Poonch matapos makabaton sang impormasyon natuhoy sa ginaalegar talaguan sang mga armas.
Apang sila ang ginpaarakan sang luthang naggikan sa sulod sang lugar, nga ginkapatay sang isa ka opisyal.
Samtang, sa isa man ka separado nga kinagamo sa Sudhnoti district, naglala man ang tensyon matapos ginbalabagan sang mga nagaprotesta ang isa ka convoy sang security forces.
Suno sa mga otoridad, ginhaboyan sila sang bato kag ginpalupkan sang armas-luthang.
Ginpahayag sang mga otoridad nga pito ka mga raliyista ang napatay sa nasambit nga insidente apang ginpaathag nga naghulag lamang bilang self-defense ang mga kapulisan.
Ang makamamatay nga mga protesta ang nag-umpisa sa rehiyon sang ang Jammu Kashmir Joint Awami Action Committee (JAAC), isa ka grupo nga nagapanguna sa isa ka mayor nga hublag-protesta, ang gindeklarar nga ‘proscribed’ ukon banned sa idalum sang anti-terrorism laws sadtong Hunyo 5.
