Ginpakigbahin sang Sangguniang Kabataan Chairman sa Barangay Villamonte, Bacolod City nga wala sini ginalauman nga siya ang malakip sa pagakilalahon nga outstanding SK Council sa bilog nga Pilipinas.
Suno kay Shaine Solidum, ini ang ikatatlo na nga tuig nga paghatag sang Philippine Sangguniang Kabataan Award sang Possitive Youth Development Network.
Sila ang nagapangita sang mga outstanding SK projects sa mga barangay sa bilog nga Pilipinas kun sa diin sila ang nagapatigayon sang assessment kun paano ginpatigayon ang programa, kasubong man ang partisipasyon sang mga pamatan-on.
Kalakip man sa ginalantaw ang accountability kag transparency sa pagpamuno sang mga Sk officials.
Suno kay Solidum, sila ang nagpasa sang portfolio sang Hulyo 10 kun sa diin kalakip sa mga nagstand out nila nga mga proyekto amo ang paghatag sang financial assistance sa tertiary students kun sa diin sila ang nakahatag sang subsidies sa 250 ka mga scholars.
Wala naman sila naghatag sang maintaining grades apang indi lang dapat magdrop sang mga subjects.
Nagtukod man ang mga ini sang Community Learning Center nga may tinutuyo nga makahatag sang co-working place sa mga pamatan-on sa Barangay Villamonte nga may computer units, access sa internet connection, meeting rooms kag study desk.
Pinaagi sini, indi na kinahanglan nga magpangita pa sang coffee shops ukon cafe ang mga pamatan-on agud lang makaangkon sang access sa maayo nga working place.
Sarang naman makigbahin diri ang tanan nga pamatan-on bisan indi botante basta mapamatud-an sang mga ini nga sila ang nagapuyo sa Barangay Villamonte.
Magluwas diri, ang Barangay Villamonte ang may-ara man sang health project nga nagahatag sang intervention sa teenage pregnancy kag awareness sa STD kag HIV.
Paathag ni Solidum nga may mga kabataan nga nahadlok ukon nahuya nga magpakigbahin natuhoy sa nasambit nga topiko gani pinaagi sini mas mangin mahapos sa ila ang magpakig-angot kag sila ang nagakoordinar man sa City Health Office inkaso nga may mga kabataan nga nagakinahanglan sang medical attention.
Ginakalipay ni Solidum nga siya ang kabahin sa nakabatun sang pasidungog, indi lang bangod sa award nga mabatun kundi bangod pinaagi sini mas mapaalintun pa sa mga pamatan-on nga wala natapos sa mga paliga ang programa nga sarang mapatigayon sang Sangguniang Kabataan.
Suno pa diri, sa pagtambong sa Philippine Sangguniang Kabataan Award madamo man ini sang mga nakit-an nga mga programa gikan sa iban nga mga local government units (LGUs) nga nakahatag sang dako nga benepisyo sa mga pamatan-on.
