Nagapinsar na ang pila ka mga small planters sang tubo nga magsaylo nalang anay sa high value crops bangod sa tuman ka nubo nga baklanay sang kalamay.
Sa interview sang Bombo Radyo Bacolod kay Alyas Nene, small planter sa banwa sang Murcia, tuman nagid ang pagnubo sang millgate price sang kalamay.
Suno diri, nagadangat na lamang sa 1.60 tubtob 1.50 millimoles per liter (mmol/L) ang purisa sa karun.
Pahayag sini nga kuntani 1.80 millimoles per liter ang ihatag sa ila, apang sila ang piyerde nagid kun magnubo pa sa 1.50 ang purisa.
Suno kay Nene sila ang wala na sang ginansya, sa baylo piyerde pa sa gastos sa pagpatubo sang tubo.
Dugang pa sini nga P700 kada tonelada ang bayad sa mga tapasero kag P600 naman sa trucking, gani gilok na lamang ang mabilin sa ila.
Bangod sini, ginapinsar ni Nene nga magsaylo na lamang sa pagtanom sang iban nga high value crops karun nga tuman ka nubo sang pamakal sang kalamay.
Nahibaluan nga bisan ang mga kongresista partikular na si Negros Occidental 5th District Representative Atty Dino Yulo ang nagapanawagan sa Sugar Regulatory Administrator nga maghatag sang paathag sa tuman nga pagnubo sang millgate price sang kalamay.
Nahibaluan nga ang millgate price sa Southern Negros Occidental ang yara na lamang sa P2,300 kada sako; kag mas manubo pa sa Northern Negros Occidental nga yara na lamang sa P2,200.
Ginakahangaw-an ang posibilidad sang pagluntad sang sugar crisis sa probinsya nga ginakilala bilang Sugar Bowl of the Philippines.
