Masobra P5 million nga balor sang ginapatihan shabu ang nakumpiskar samtang lima naman ka mga persona ang naaresto sa pagserbe sang Philippine Drug Enforcement Agency sang search warrant sa duha ka mga balay sa Avida Subdivision, Barangay Matab-ang, Talisay City, Negros Occidental, Huwebes sang aga.
Una nga ginsulod sang PDEA ang balay nga ginapanag-iyahan ni Rhodora Jamantoc alyas Neneng, 57-anyos kag isa ka high value target sang ahensya.
Naaresto si Jamantoc kag ang tatlo ka mga lalaki nga kaupod sini sa balay nga sanday Robert Descutido, Ellabon Escober kag Eul Vincent Suanico.
Narekober sang mga pulis ang 650 grams sang suspected shabu nga ginabanta nagabalor sang P4.4 million.
Lunsay nagpanginwala ang mga nadakpan sa amo nga akusasyon.
Suno kay PDEA Agent Bamboo, hinablos ni Jamantoc ang isa nga nadakpan samtang nagbisita lamang ang duha.
Matapos nahalughog ang balay ni Jamantoc, gin-search naman sang otoridad ang balay ni Markline Cuadra alyas Fiveball nga tupad lang sang balay sang female subject.
Gamit ang sniffer dog, narekober sang PDEA sa ground floor ang 100 grams sang suspected shabu nga ginabanta nagabalor sang P1 million pesos.
Suno kay Agent Bamboo, kaso nga paglapas sa Section 11 sang Comprehensive Dangerous Drugs Act ukon possession of illegal drugs ang ipasaka batok sa lima ka arestado.
Santo sa rekord sang PDEA, kaangay man nga kaso ang ginapangatubang sadto ni Cuadra kag Jamantoc apang nahilway matapos makapyansa.
Nagikan sa high value target operation, ginpasaka kaina sa high impact operation ang category sang operasyon nga ginpatigayon sang PDEA bangud sa kadakuon sang volume sang shabu nga nakumpiskar.
