Nagalaom ang pinuno sang Social Action Center sang Diocese of Bacolod nga pamatian sang gobyerno ang kawsa sang mga drivers nga nagpatigayon sang People’s Holiday kahapon.
Nahibaluan nga ginpatigayon ang pag-untat biyahe kahapon kasunod sang asod-asod nga pagsaka sang presyo sang produktong petrolyo sa sulod sang pila na ka semana kun sa diin ang simbahan ang isa man sa nag-ugyon.
Suno kay Father Chris Gonzales, ginapanginbulahan sini ang transport group nga nagpakigbahin sa nangin madinalag-on nga People’s Holiday.
Nagalaom si Gonzales nga napamatian man ang kawsa sang mga drivers kag may yara sang mga tikang nga himuon ang national government natuhoy sa excise tax kag sa oil deregulation law ukon RA 8479.
Ginsuportahan man sang simbahan ang tikang nga ginhimo sang transport sector paagi sa pag-edukar, pagpangamuyo kag paghatag sang mga goods.
Nagapati ang pari nga naintindihan sang mga pumuluyo ang kawsa sa ginpatigayon nga transport strike gani ini ang gin-ugyunan.
Nagapanawagan man si Gonzales sa tanan nga dulaon sa paminsaron nga ang mga rally, strike ukon ang pagpabutyag sang sentimyento ang masabad bangud kinahanglanon man ini ilabi na sang mga kinahanglan nga pamatian.
Nagpanugyan man ang pari nga dapat pamatian ang kaangay nga rally nga may lehitimo nga kawsa, updan kag pangamuyuan bangud ini ang panawagan sang tanan.
