Sa social media page ni Cristina Martino ukon Team Langga page ginpatpat sini nga una luyag sini kuntani nga sa Laoag City, Ilocos Norte nalang i-proseso ang iya nga piyansa apang gin-abisuhan siya nga sa ciudad nalang sang Bacolod agud nga mahapos nalang ang magproseso kun kinahanglan sang mga papeles kaangay sang Barangay Certificate.
Suno kay Martino wala ini sang ginpahibalo nga nagpauli ini sa ciudad sang Bacolod agud nga magproseso sang iya mga kinahanglanon nga dokyumento antes nagsungka sa Bacolod Police Station 2.
Ginsekreto lang man sini ang tanan agud nga indi makahibalo ang iya iloy nga malakat siya bangud nagakabalaka man ini basi kun ano pa ang matabo sa iya.
Matapos ang booking process sa nasambit nga police station nakibot ini nga may yara sang media reporters bangud wala man sang nakahibalo nga didto ini magasungka.
Nagproseso man ini sang iya piyansa sa Bacolod Hall of Justice kag nagbayad sang P72,000 para sa iya temporaryo nga kahilwayan.
Ginpahayag man ni Martino nga cyber libel ang kaso nga ginpasaka batok sa iya.
Suno sa Bacolod City Police Station 2, si Martino ang ginkasuhan sang violation sang Section 4 (c) sang Republic Act No. 10175 ukon ang Cybercrime Prevention Act of 2012.
Ang warrant of arrest ang gin-issue ni Judge Richard Bala Balucio, presiding judge sang First Judicial Region, Branch 15 RTC, Laoag City, Ilocos Norte nga napetsahan June 24, 2025.
Madumduman nga sang Pebrero 2024, ginserbehan man si Martino sang warrant of arrest bangud sa kaso nga cyber libel. Ang nasambit nga kaso ang gin-file sa korte sa Laoag.
