Ginakalipay sang indigent nga senior citizen nagikan sa Barangay Villamonte sa syudad sang Bacolod nga isa na ka layi ang hagna ni Senator Joel Villanueva nga may tinutuyo nga madugangan ang social pension nagikan sa P500 pasaka sa P1,000.
Suno kay Editha Salolog, dako na nga bulig sa iya ang social pension nga iya nabaton bangud ini ang iya ginabakal sang bulong kag ginagamit man magpaultrasound sang operasyon sini sa iya dughan.
Si Salolog ang may tatlo ka mga kabataan nga lunsay may kaugalingon naman nga pangabuhi nga iya napatapos sa pagtuon kag nakuha sang kurso paagi sa pagbulante niya sa Libertad Public Market.
Suno diri, apisar nga may mga trabaho na ang iya nga mga kabataan wala siya nagasalig diri bangud naluoy man siya diri nga pigado man ang pagpangabuhi.
Indi man siya kuntani pagpasugtan sang iya mga kabataan apang nagapamilit ini sa pagbalik sa pagbaligya bangud nagaluya ang lawas sini sa tion nga mag-untat.
Ginpasalamatan sini ang tanan nga mga mamalidha nga nangin instrumento agud nga maaprubahan ang hagna kag nangin layi nga madugangan ang ila nabaton nga social pension.
