May patigayunon nga general assembly bwas ang mga social worker bilang kabahin sang pagsaulog sang Social Worker Day ukon adlaw sang mga mamumugon sa Social Hall sang Provincial Capitol sa Bacolod City.
Sa interview sang Bombo Radyo kay Dionela Madrona, Acting President sang Philippine Association of Social Workers Inc. (PASWI), Negros Occidental Chapter, malapad ang trabaho sang isa ka social worker lakip na diri ang pag-atubang sang problema sang isa ka indibidwal, pamilya, kag tubtob sa komunidad.
Nagahatag man sila sang assistance sa mga indibidwal nga nagapangatubang sang kabudlayan.
Suno diri, isa sa mga challenges amo ang amo ang pagpalab-ot sang impormasyon sa publiko nahanungod sa mga serbisyo kag programa nga mahimo mahatag sang mga lokal nga panguluhan kag mga national agency.
Gani, gina-agda sini ang publiko nga indi mahadlok mamangkot kag magkadto sa ila local social welfare office agud mahibaluan ang mga programa nga mahimo makabulig sa ila.
Lakip sa mga benepisyaryo sang nagkalain-lain nga programa amo ang mga pamatan-on, persons with disabilities (PWDs), single mothers, kag iban pa nga nagakinahanglan sang suporta.
Gina-imbitar sini ang tanan nga social workers sa probinsya nga mag-upod sa general assembly kag election of new officers bilang kabahin sa pagsaulog sang adlaw sang mgga mamumugon kag sa pagtalakay sang mga isyu kag cocerns.
