Preparado na ang Senior kag Major team sang Softballl Team para sa Little League World Series sa Estados Unidos.
Sa interview sang Bombo Radyo kay coach Tony Oquindo sang Senior League, handa na ang 16 ka players sa ila nga match sa Delaware, USA sa Hulyo 31 tubtob Agosto 16.
Suno diri, ang team nga para sa iya nga mabudlay atubangon amo ang team nagikan sa Texas, Puerto Rico, kag Michigan.
Ini bangod nga dalagko ang ila nga players kumpara sa team sang Pilpinas.
Aminado ini nga kun maghanot ang kontra halos nagalapaw ini sa kudal apang kun sa kadasigon naman sa pagdalagan, ang team sang Pilipinas wala nagapapierde.
Dugang pa niya, preparado na ang team bangod sila may malawig nga tion sang training.
Pahanumdum ni Oquindo sa mga players nga ibilin ang problema sa Pilipinas kag magfocus sa hampang.
Samtang, 99 percent naman nga preparado ang Major League Softball team, ang 15 nila ka players magahampang sa North Carolina sa Agosto 6 tubtob Agosto 13.
Suno diri, ang players sang Pilipinas may kabudlayan pa para mag-adjust sa klima sa North Carolina apang makit-an sa mga players nga luyag gdi nila nga dayunon ang hampang.
Aminado man ini nga dako aNg pressure para sa ila bilang coach bangod nga dako ang suporta nga ila nabaton kag ila gid ini balikan.
Ginapadumdum man sini sa mga players nga wala na dapat sila sang kakulbaan bangod nga sa pagsulod nila sa world series, sila ginakabig na nga champion, kag indi lamang ang Pilipinas ang ila ginarepresenta, apang ang bilog na nga Asya.
Pahayag ni Jalandoni, uhaw na ang players sa paghampang kag sila 99 percent na nga handa para sa Little League World Series.
