Nagpatigayon sang meeting ang Solid Waste Management Board sang Bacolod City agud nga maestoryahan ang pagpatukod sang cell no. 5 bangud halos nabuta na ang cell no.4 ukon ang sanitary land fill sa Barangay Felisa.
Sa interview sang Bombo Radyo Bacolod kay Councilor Homer Bais, chairperson sang Committee on Environment and Ecology sa Sangguniang Panlungsod, nangin sentro sang ila nga meeting amo ang pagbukas sang bag-o nga sanitary land fill bangud halos mabuta na ang sa Barangay Felisa.
Suno kay Bais, ginsuhestyon sini sa alkalde nga dapat magpangita sang mas dako nga lugar para sa cell no. 5 agud nga madugay man antes nga mapuno bangud sa iban nga Local Government Units gani nagadangat sa tatlo ka tuig antes mapuno.
Dugang pa sini nga sang tinalikdan nga adlaw ginpatawag man sla sang alkalde kaupod ang mga Barangay Officials agud nga hambalan ang hugot nga pagpatuman sang segregation sang mga basura.
Suno diri, dako ang bahin sang tagsa ka mga pumuluyo sa tagsa ka Barangay sa pagpatuman sang segregation sang mga basura nga nasanto sa nakasaad sa Republic Act 9003, ukon ang Ecological Solid Waste Management Act of 2000.
Ginpahayag man ni Bais nga dapat ang Barangay kaupod ang IPM Construction and Development Corporation ang hugot nga ipatuman ang segregation sa mga basura agud nga masolusyunan na ang nasambit nga problema.
