Luwas na sa katalagman ang 18 anyos nga lalaki matapos nga gin-injectionan sang insecticide sang 15 anyos nga babayi nga luyag sini nga bulagan sa Brgy. Bunga, banwa sang Salvador Benedicto, Negros Occidental.
Madumduman nga sang Miyerkules nagkitaay ang duha para mag-estorya nga untaton na ang ila relasyon.
Apang, paghakos sang babayi sa lalaki hinali sini nga gin-injectionan ang liog sang lalaki sang insecticide nga ginbutang sini sa syringe.
Matapos ang pila ka minutos, nakabatyag sang paglain sang pamatyag ang lalaki, kag naglingin ang ulo sini kag nagsululuka.
Gilayon man nga nagbakal ang babayi sang gata kag ginpa-inom sa lalaki, apang wala ini naumpawan kag gindala na lang sa ospital kun sa diin ini gin-admit.
Sa interview sang Bombo Radyo Bacolod kay sa Police Captain Ignacio Javier, Deputy Chief of Police sang Salvador Benedicto Municipal Police Station, may settlement na sa duha ka bahin kag ang pamilya sang babayi ang magabayad sang gasto sa pagpa-ospital sang lalaki.
Suno diri, luyag na lamang sang pamilya sang duha ka menor de edad nga indi na magparecord pa para sa privacy sang ila pamilya.
